Министрлер Кабинетинин башчысы Ысык-Көл облусуна болгон иш сапарынын алкагында мөмө-жемиш азыктарын өндүргөн «Этнопродукт» ишканасына барды.
Министрлер Кабинетинин башчысы цехтерди карап чыгып, өндүрүш процесси менен таанышты. Белгиленгендей, компаниянын продукциясы Россия Федерациясына экспорттолот, ишкананын өндүрүштүк кубаттуулугу күнүнө 5 тоннага чейин даяр чийки затты түзөт.
Улукбек Марипов ошондой эле катуу мөндүрдүн кесепетинен айыл чарба өсүмдүктөрүнүн түшүмү бузулган Түп районунун Арал айыл аймагынын жер тилкелери менен таанышты. Тактап айтканда, 647 гектар арпа, 71 гектар буудай, 376 гектар эспарцет, 29 гектар картошка, 22 гектар сарымсак, ошондой эле 500 карагаттын көчөттөрү. Себүү иштерине 7,8 миллион сомдон ашык каражат сарпталды.
«Быйыл нөшөрлөп жааган жамгырдын, мөндүрдүн, селдин кесепетинен республиканын бир катар аймактарындагы дыйкандардын түшүмү жабыркады. Ал эми дыйкандар кредит алышкан. Айыл, суу чарба жана региондук өнүктүрүү министрлиги келтирилген жоготуулар боюнча бардык маалыматты чогултуп, маселени чечүү боюнча сунуштарды бериши керек. Биз аларды банктар менен бирге карайбыз», – деди ал.
Министрлер Кабинетинин Төрагасы айыл чарбасына заманбап технологияларды жана техникаларды киргизүүнүн маанилүүлүгүн белгиледи.
«Айыл, суу чарба жана региондук өнүгүү министрлигине жана Айыл банкына пилоттук долбоорду иштеп чыгуу жана ишке ашыруу тапшырылды, ага ылайык ар бир региондо 10 гектар жер аныкталып, тамчылатып сугаруу киргизилет. Тамчылатып сугаруу программасын кабыл алып, айыл чарба тармагына заманбап технологияларды киргизүү, түшүмдүүлүктү жогорулатуу жана ресурстарды сарамжалдуу пайдалануу керек», – деди ал.
Улукбек Марипов айыл чарба ишканаларын колдоо үчүн мамлекеттик финансы институттарынан тиешелүү насыялоо программалары бар экенин улантты. Анын айтымында, райондун жакшы кара топурагы жана климаттык шарттары күн карама өстүрүүгө ылайыктуу.
«Биз өлкөнүн түндүк жана түштүк аймактарында өсүмдүк майын чыгаруучу 2 завод курушубуз керек. Бул багытты каржылоо Россия-Кыргызстан өнүктүрүү фондуна сунушталды»,-деп кошумчалады ал.
Министрлер кабинетинин төрагасы ошондой эле Түп районунун Тасма айылынын тургундары менен жолугушту. Алар көп жылдан бери каражат бөлүнбөгөн жолдун курулушу боюнча көйгөйлүү маселени көтөрүштү.
Улукбек Марипов белгилегендей, эмдиги жылы аны жолдун курулушунун жана реконструкциясынын тиешелүү тизмесине киргизүү маселелери каралат.