Ысык-Көл облусунда 2-августта Балыкчы-Ананьево-Каракол унаа жолунда адам өлүмү менен коштолгон жол кырсыгы катталып, анын себептери жана кесепеттери боюнча ЖКККБ басма сөз кызматы түшүндүрмө берди.
2-август күнү саат 15:20 Ысык-Көл районунун Чырпыкты жана Тору-Айгыр айылдарынын ортосунда жол кырсыгы болгондугу тууралуу милицияга маалымат түшкөн.
Окуя болгон жерге Ысык-Көл РИИБдин кызматкерлери жана шаардык милициянын кайгуул-күзөт кызматынын инспектору барган. ЖКККБ маалыматына ылайык, Кара-Балта шаарынын 2001-жылы туулган тургуну З.у.Э. «Опел-Зафира» үлгүсүндөгү унааны айдап бара жатып, рулду башкара албай, кырсыкка кабылган. Алдын ала маалыматтар боюнча, дөңгөлөк жарылып, кырсыкка себеп болгон.
Натыйжада Опелдин эки жүргүнчүсү 1982-жылы туулган И.Т. жана 1966-жылы туулган И.Г. окуя болгон жерден каза болгон. Айдоочу, ошондой эле дагы бир жүргүнчү 2001-жылы туулган Э.у.Н. Балыкчы шаардык ооруканасынын жандандыруу бөлүмүндө.
Маалыматтарга караганда, каза болгондор Казакстандын жарандары.
Бул факты Ысык-Көл РИИБде катталган. Экспертиза дайындалды.