Кыргызстандын 40 жаштагы жараны К.Н.дин жансыз денеси Түркиядан табылды. Жүргүзүлгөн ыкчам-иликтөө иш-чараларынын жүрүшүндө аялды атып өлтүргөндүгү аныкталган. Бул тууралуу Кыргызстандын Түркиядагы элчилигинен билдиришти.
Дипломатиялык өкүлчүлүктүн маалыматы боюнча, сөөк 21-июнга караган түнү Гиресун провинциясындагы токойдон табылган.
«Учурда Түркиянын укук коргоо органдары тарабынан ыкчам-издөө иш-чаралары жүргүзүлүүдө. Адам өлтүрүүгө шектелген М.А. менен Х.Ч. кармалды», — деп консулдуктан билдиришти.
Түркиянын Haberturk басылмасы аялдын денесинде октун жарааты табылгандыктан атып өлтүрүлгөнүн кабарлады.
Маалым болгондой, кармалгандардын бири анын күйөөсү М.А. кызганычтан улам киши өлтүргөнүн мойнуна алган.
Башкы консулдук маселени көзөмөлдөп турат.
