Бишкек шаарынын административдик соту КР Маданият министрлигинин «Клооп» сайтынын орус тилдүү версиясын жабуу жана бул ресурстан материалды алып салуу боюнча чечимдерин күчүн жоготту деп тапты. Бул тууралуу басылманын редакциясы билдирди.
Сотто «Клооп» кызыкчылыгын коргогон юрист Нурбек Сыдыковдун айтымында, эгер Бишкек шаардык соту ушундай чечим чыгарса, басылманын сайты эми бөгөттөн чыгарылат.
Соттун акыркы чечими КР Маданият министрлигинин чечимдеринин негизинде жабылган «Клооп» сайтынын орус тилдүү версиясына гана тиешелүү. Эске салсак, өткөн жылы «Клооп» сайты Маданият министрлигинин доо арызы боюнча соттун чечиминен кийин жабылган. Бөгөт коюуга УКМКга арыз келип түшкөн “Саясатчы Равшан Жээнбеков СИЗО-1де кыйноого алынып жатканын айтты” деген аталыштагы материал себеп болгон.
Ошондой эле ушул жылдын февраль айында Октябрь райондук соту Kloop.kg басылмасынын юридикалык жактарынын бири болгон «Клооп Медиа» коомдук фондун жоюу чечимин чыгарган.