Ысык-Көл облусунда аялдын денесине залал келтирүүдөн улам зордук-зомбулук менен өлүмү боюнча иликтөө иштери жүрүп жатат.
Облустук ИИБ басма сөз кызматы мас абалындагы күйөөсү аялын ур-токмокко алып, комада жатып калганын, андан соң аял каза болгонун билдирди.
Ооруканадан милицияга Бостери айылынын 44 жаштагы тургуну С.Т. оор абалда денесинен көрүнгөн жаракаттар менен түшкөндүгү тууралуу маалымат түшкөн.
«Райондук оорукананын реаниматологунун корутундусуна ылайык, жаран С.Т.нын баш мээси чайкалып, комага түшкөн», — деп айтылат милициянын маалыматында.
Бул факты боюнча «Ден соолукка атайылап оор залал келтирүү» беренеси боюнча кылмыш иши козголгон.
Андан соң кылмышка шектүү — С.Т.нын күйөөсү 50 жаштагы Ш.К. кармалып, Ысык-Көл облусунун убактылуу кармоочу жайына киргизилген.
Милиция кызматкерлери 9-май күнү саат 20:00-21:00 чамасында жубайлардын ортосунда оозеки жаңжал чыкканын аныкташкан.
«Ш.К. мас абалында аялынын башына жана курсагына бир нече жолу жаракат келтирген, С.Т. эсин жоготкондон кийин күйөөсү төшөккө жатып алган.
Эртеси саат 06:00 20 жаштагы уулу Б.Э. үйүнө келген. Апасын эс-учун жоготкон абалда таап, тез жардам кызматын чакырып, андан соң аял комага түшкөн абалда жеткирилген», — деп айтылат ИИБдин маалыматында.
С.Т. эсине келбей каза болгон.
