Мүмкүнчүлүгү чектелген 6 жаштагы баланы сабоо фактысын чагылдырган ЖМКларда пайда болгон видео материалдарга бийлик реакция жасады.
Бул тууралуу президенттик аппараттын маалыматтык саясат бөлүмү билдирди.
Бишкектеги «Аутизм победим kg» коомдук фондусунда баланын сабалышы боюнча кырдаал балдардын укуктары боюнча акыйкатчы Жыпариса Рысбекованын көзөмөлүндө.
«Жагдайды тактоо үчүн Жыпариса Рысбекова баланын энеси менен жолугушуп, ал жалпы үй-бүлөнүн абалы жана болуп өткөн кырдаал жөнүндө айтып берди. Учурда үй-бүлө бала үчүн атайын кызматтарды алуу үчүн Ош облусунан Бишкекке убактылуу көчүп келгендиги белгиленди», – деп айтылат билдирүүдө.
Сүйлөшүү учурунда Балдар укуктары боюнча Акыйкатчы балдарга карата мындай зордук-зомбулук фактыларына көзөмөл күчөтүлөрүн баса белгиледи.
Социалдык кызматтарды көрсөтүүчү бардык уюмдарга кеңселерине видеокамераларды орнотуп, жумушка алууда кызматкерлерди кылдаттык менен тандап алууну, ушул уюмдарда иштеген кызматкерлерге талапты күчөтүүнү сунуштоо чечими кабыл алынды. Белгиленгендей, баланын энеси Биринчи Май РИИБге арыз берген.