Караколдо күйөөсү майып аялын катуу сабап салган. Натыйжада аял медициналык жардамга кайрылууга аргасыз болгон.
Күйөөсү тарабынан мыкаачылык менен сабалган А.У. арыз жазды. Бул тууралуу Ысык-Көл облусунун ички иштер башкармалыгынан билдиришти.
Ведомстводон билдиришкендей, сотко чейинки өндүрүш ооруканадан түшкөн арыз боюнча башталган. Тергөөнүн жүрүшүндө жабырлануучу арыз менен кайрылган. Ал маалымат реестринде катталган.
«Ооруканадан жана жабырлануучудан түшкөн эки билдирүү биригип, кылмыш иши козголду», — деп түшүндүрүштү ИИБ.
14-майда шаардык милицияга аймактык ооруканадан 38 жаштагы майып аял денесинен жаракат алып келгендиги тууралуу маалымат түшкөн.
Тергөө тобу ага күйөөсү денесине залал келтиргенин аныкташкан. Ал КР Жазык кодексинин «Кыйноо» жана «Үй-бүлөлүк зомбулук» беренелери боюнча кылмыш иши козголгон. Шектүү бир айлык мөөнөткө Каракол шаарынын СИЗОсуна киргизилген.
Адвокат Камил Рузиевдин айтымында, бул майып аялдын күйөөсү тарабынан биринчи сабалышы эмес.
