Кыргызстандын Өзгөчө кырдаалдар министрлигинин берген маалыматына ылайык, өткөн дем алыш күндөрү өлкөнүн суу объектилеринде беш адам чөгүп кетти. Каза болгондордун экөө жети жаштагы балдар экени белгиленди.
Министрликтин маалыматына ылайык, 2005-жылы туулган жигит Кемин районунун Жел-Арык айылындагы көлмөдө чөгүп кеткен. Окуя болгон жерге саат 19:35 чамасында келген куткаруучулар маркумдун сөөгүн суудан чыгарып, ИИМ кызматкерлерине өткөрүп беришкен.
Аламедин районунун Лебединовка айылында 2005-жылы туулган жигит сууга чөгүп кетти. Издөө иштерине 3 куткаруучу тартылган. Караңгы киргенге байланыштуу, издөө саат 00:15 чамасында убактылуу токтотулган. 10-августта издөө иштерине 5 куткаруучу тартылып, саат 07:00 чамасында маркумдун сөөгүн суудан алып чыгып, Ички иштер министрлигинин кызматкерлерине өткөрүп беришкен.
Ошондой эле, 7-августта Кочкор районунун Тендик айылында 2013-жылы туулган жигит Чу дарыясына чөгүп кеткен. 9-августта издөө иштерин жүргүзүү үчүн 11 куткаруучу тартылган. Караңгы киргенге байланыштуу, издөө иштери саат 20:20да убактылуу токтотулган. Издөө эч кандай натыйжа берген жок. Издөө иштери 10-августта улантылат.
Мындан тышкары, 8-августта Ала-Букада Орто-Токой суу сактагычында 1994-жылы туулган адам чөгүп кеткендиги тууралуу маалымат келип түшкөн. 9-августта 7 куткаруучу, Ички иштер министрлигинин 4 кызматкери жана 20 жергиликтүү тургундар Кыргыз Республикасынын Өзгөчө кырдаалдар министрлиги менен издөө иштерин жүргүзүүгө тартылган. Саат 12:00 чамасында издөө иштеринин жүрүшүндө эркек кишинин сөөгү табылып, туугандарына өткөрүлүп берилди.
9-августта Кара-Суу районунда 2013-жылы туулган бала Мвдыда Ачы айылынын каналына чөгүп кетти. Издөө иштерине 4 куткаруучу жана 10 жергиликтүү тургун тартылган. Түн караңгы болгондуктан, издөө иштери саат 21:20да убактылуу токтотулган. Издөө иштери 10-августта улантылат.