Кыргызстандын президенти Садыр Жапаров менен Австриянын тышкы иштер министри Михаэль Линхарттын жолугушуусу болуп, анда тараптар кызматташуу, атап айтканда туризм тармагындагы маселелерди талкуулашты.
Жолугушуу “Борбор Азия – Европа Биримдиги” Биринчи Эл аралык экономикалык форумунун алкагында өттү.
Мамлекет башчысы Австрия Кыргызстандын Европа Биримдигине мүчө мамлекеттердин арасында маанилүү өнөктөшү экенин баса белгиледи.
Ал келерки жылы Кыргызстан менен Австриянын ортосундагы дипломатиялык мамилелердин 30 жылдыгын белгилөө пландалып жатканын эске салды.
«Бул убакыттын ичинде биз кызматташуунун узак жолун басып өттүк. Келерки жылы эки тараптуу кызматташуубуздун маанилүү датасын эске алуу менен биз австриялык тарапка бир катар биргелешкен иш-чараларды өткөрүүнү жана кызматташуубуздун бардык багыттары боюнча биргелешкен Жол картасын иштеп чыгууну сунуштайбыз», – деп сунуштады Садыр Жапаров.
Мамлекет башчысы эки тараптуу кызматташтыкты, анын ичинде Австрия менен соода-экономикалык кызматташтыкты мындан ары да кеңейтүүгө жана бекемдөөгө даяр экенин билдирди.
«Бизде соода-экономикалык кызматташтык үчүн пайдаланыла элек олуттуу потенциал бар деп эсептейбиз», – деди ал жана Кыргызстан эки өлкөнүн ортосундагы өз ара сооданын көлөмүн көбөйтүү үчүн өз ара товарлардын тизмесин кеңейтүүгө кызыкдар экенин кошумчалады.
Мамлекет башчысы Кыргызстандын ири гидроэнергетикалык потенциалына өзгөчө көңүл буруп, Австрия менен ири жана кичи ГЭСтерди куруу боюнча кызматташууга кызыкдар экенин билдирди.
Өз кезегинде Майкл Линхарт дүйнөдөгү пандемияга байланыштуу кырдаалга карабастан кыргыз тараптын меймандостугу жана иш-чараны жогорку деңгээлде уюштургандыгы үчүн ыраазычылык билдирди.
Ал Австрия Кыргызстан менен кызматташууну кеңейтүүгө, анын ичинде Ооганстандагы кырдаалды эске алуу менен аймактык маселелер боюнча да кызыкдар экенин белгиледи.
Жолугушуунун жүрүшүндө соода-экономикалык жана маданий-гуманитардык, ошондой эле туризм тармагындагы эки тараптуу кызматташтыкты кеңейтүү маселелери талкууланды.