Евробиримдик өлкөлөрүндөгү Украинадан келген качкындардын саны 6 миллиондон ашты, алардын жарымынан көбү Польшага келген. Бул тууралуу бейшемби күнү Евробиримдиктин Frontex чек араны көзөмөлдөө агенттиги өзүнүн расмий сайтында билдирди.
“Украинадан 6 миллиондон ашык качкын чыгып кетти. Анын ичинен Польшага 3 миллиондон ашыгы, Молдовага 1 миллиондон ашыгы келген. Согуштун алгачкы 10 күнүндө ЕСтин чек аралары 125 миңге жакын адамды кесип өткөн болсо, азыр алардын саны күн сайын 34 миңге чейин кыскарган”, — деп айтылат маалыматта. Сайттагы инфографикада Молдова качкындар Румынияга өтүүчү транзиттик өлкө катары көрсөтүлгөн, ал жакка Украинадан 1,1 миллиондон ашык адам келген.
«Акыркы 10 күндүн ичинде орточо эсеп менен Евробиримдикке мүчө өлкөлөрдөн Украинага күн сайын 25 миңдей украиналык жөнөп кетти. Жалпысынан согуш башталгандан бери Украинага 1 миллионго жакын украиналык кирди», — деп билдирди агенттик.
Frontex агенттигинин маалыматы боюнча, Евробиримдиктин Украина менен чек арасында 362 агенттиктин кызматкери туруктуу иштешет. Жалпысынан Frontexтин Евробиримдиктин чыгыш чек араларында 527 кызматкери бар. Алар миграциялык агымдардын абалын күнү-түнү көзөмөлдөп турушат. «Заманбап технологияларды, анын ичинде спутниктерди колдонуу менен агенттик ошондой эле мүчө мамлекеттерге кырдаалды түшүнүүгө жана алдын ала айтууга жардам берет», — деп баса белгиленет билдирүүдө.
