Түркмөнстандын улуттук лидери Гурбангулы Бердымухамедовдун уулу президент Сердар Бердымухамедов армиянын генералы наамын алды.
Түркмөнстандын президентине армиянын генералы деген аскердик наам ыйгарылганын өлкөнүн «Алтын кылым» мамлекеттик маалымат агенттиги билдирди.
«Түркмөнстандын парламенти Түркмөнстандын Конституциясынын 81-беренесине ылайык, Түркмөнстандын президенти, Түркмөнстандын Куралдуу күчтөрүнүн Жогорку командачысы Сердар Гурбангулыевич Бердымухамедовго армиянын генералы аскердик наамын ыйгаруу жөнүндө чечим кабыл алды», — деп өлкөнүн Межлисинин токтомунда айтылат.
Буга чейин Түркмөнстандын мурдагы президенти Гурбангулы Бердымухамедов улуттук лидер болуп жарыяланып, анын ыйгарым укуктары да аныкталган.
Эми жаңы эрежелерге ылайык, ал өлкөнүн элине кайрылууга туруктуу укугу бар, ал Түркмөнстандын парламентинин жыйындарында, ошондой эле саясий партиялардын жыйындарында жана съезддеринде сүйлөй алат.
Гурбангулы Бердымухамедов президенттик кызматтан 2022-жылдын март айында кеткен. Ошол эле айда мөөнөтүнөн мурда президенттик шайлоо өтүп, аны анын уулу Сердар Бердымухамедов жеңген. 19-мартта анын инаугурациясы болгон.
Былтыр май айында улуттук килем токуу өнөрүн өнүктүрүүгө кошкон зор салымы үчүн Сердар Бердымухамедовдун апасы Огулгерек Бердымухамедовага Түркмөнстандын эмгек сиңирген килемчиси наамы ыйгарылган. Мындай чечимди өлкөнүн президенти кабыл алды.