Өкмөткө билим берүү мекемесинин абалы боюнча көптөгөн даттануулар түшкөндүктөн Улукбек Марипов Талас районунун Көк-Кашат айылындагы Атай Огонбаев атындагы мектепке текшерүү менен келген.
Бул тууралуу өкмөттүн порталы кабарлады.
Курулуш иштери 2015-жылы аяктаганына карабастан, класстардын абалы канааттандырарлык эмес. Мектептин спорт залынын полу чириген, көмүр казаны класстарды жакшы жылытпайт.
Министрлер Кабинетине караштуу Архитектура, курулуш жана турак жай -коммуналдык чарба мамлекеттик агенттигинин маалыматы боюнча, өндүрүш технологияларынын, курулуш нормаларынын жана эрежелеринин одоно бузуулары аныкталган, подрядчыга техникалык жана конструктордук көзөмөл толук сакталган эмес.
Улукбек Марипов ички текшерүү жүргүзүүнү, бул мыйзам бузууларга жол берген адамдарды жоопко тартууну тапшырды. Кабинеттин башчысы ошондой эле мектепти жаңы окуу жылына даярдоону тапшырды.
Мектеп 375 окуучуга ылайыкталган. 2015 -жылы жаңы окуу корпустары, спорт зал жана галерея, откана, ошондой эле инженердик тармактар курулган.