Улуттук тарых музейинде “Маалымат коомундагы эс тутум, китеп жана окуу институттары” III эл аралык конференциясы өтүүдө. Маанилүү илимий иш-чарага КМШнын сегиз өлкөсүнүн алдыңкы музейлеринин жетекчилери, окумуштуулар, элчиликтердин жетекчилери, эл аралык жана коомдук уюмдардын өкүлдөрү, ошондой эле Кыргызстандын жети облусунан келген музей адистери жана белгилүү илим, маданият жана билим берүү ишмерлери катышты.
«Кыргызстанга Азербайжандан, Армениядан, Белоруссиядан, Казакстандан, Өзбекстандан, РФдан жана Түркмөнстандан тарыхый жана маданий мурастарды изилдөөгө көп жылдарды арнаган көрүнүктүү илим докторлору келишти. Жыйындын жүрүшүндө тарыхый-маданий баалуулуктарды сактоону, изилдөөнү жана жайылтууну камсыз кылуу боюнча пикир алмашышат, андыктан өлкөбүздөгү конференция келечек үчүн маанилүү окуя болуп жаткандай. Идеологияга байланыштуу мындай иш-чаралар жана кабыл алынган жарлыктар улуттук биримдик жана эл аралык кызматташтык үчүн маанилүү», — деди КР статс-катчысы Сүйүнбек Касмамбетов.
Пленардык жыйындардын жүрүшүндө конференциянын катышуучулары санариптештирүү доорунда китеп окууну жана тарыхый билимдерди жайылтууга, ошондой эле маалымат алуу үчүн акыркы технологияларды колдонууга байланыштуу демилгелерге чоң басым жасашат.
Конференция ошондой эле музейлердин жана башка маданий мекемелердин жетекчилеринин, ошондой эле сегиз өлкөнүн көрүнүктүү окумуштууларынын илимий баяндамалары үчүн аянтчаны түзөт. Алар музейлерди, илимди, маданиятты, китепканаларды трансформациялоо, санариптик электрондук технологияларды колдонуу менен байланышкан жетишкендиктер жана көйгөйлөр жана тарыхый мурастар боюнча изилдөөлөрү менен бөлүшөт.
Конференциянын алкагында Чыңгыз Айтматовдун 95 жылдыгына арналган «Музей иштери жана маданий баалуулуктарды коргоо» деген темада тегерек стол да уюштурулат.
Белгилей кетсек, “Маалымат коомундагы эс тутум, китеп жана окуу институттары” III эл аралык конференция 25-майдан 27-майга чейин өтөт. Ал КР Президентинин “Кыргыз Республикасынын тарыхый-маданий мурастарынын объектилерин сактоого, изилдөөгө жана пропагандалоого мамлекеттик колдоо көрсөтүү жөнүндө” Жарлыгын ишке ашыруунун алкагында өткөрүлүүдө.