2024-жылдын 15-январынан тарта Бишкек шаарындагы жеке менчик медициналык клиникаларды, тиш доктурларды, ошондой эле бала бакчаларды жана мектептерди рейддик текшерүүлөр башталат. Бул тууралуу Саламаттык сактоо министрлигинин басма сөз кызматы аталган мекеменин жетекчиси Алымкадыр Бейшеналиевдин борбор калаанын Мамлекеттик санитардык-эпидемиологиялык көзөмөлдөө борборунун өкүлдөрү менен болгон жолугушуусунан кийин билдирди.
Жыйында сасык тумоо, КРВИ, вирустук гепатит, кызамык жана башка жугуштуу оорулардын көбөйүшүнө байланыштуу маселелер талкууланды. Жыйындын жыйынтыгы менен үстүбүздөгү жылдын 15-январынан тарта текшерүүлөрдү жандандыруу чечими кабыл алынды. Рейддер тиешелүү лицензиясы жок жеке менчик медициналык мекемелерди, стоматологиялык кабинеттерди, мектеп, бала бакчаларды аныктоого багытталган.
Ошондой эле коомдук тамактануу жайларында санитардык китептердин бар-жоктугун жана санитардык нормалардын сакталышын текшерүү маанилүү жагдай болуп саналат.
Иш-чаралар жарандардын коопсуздугунун жана ден соолугунун жогорку стандарттарын сактоого багытталган.