Кыргызстандын Мирсаид Миррахимов атындагы Улуттук кардиология жана терапия борборунда жүрөк-кан тамыр оорулары менен ооруган бейтаптарга жардам көрсөтүү үчүн уникалдуу медициналык жогорку технологиялык рентген хирургия борбору ачылды.
Ачылыш аземинде саламаттыкты сактоо министри Алымкадыр Бейшеналиев жаңы борбор Дүйнөлүк банктын колдоосу менен COVID-19 өзгөчө кырдаалдарга чара көрүү долбоорунун алкагында алынган заманбап ангиографиялык комплекс менен жабдылганын баса белгиледи. Бул алдыңкы технологияларды жана инновацияларды колдонуу менен жүрөк-кан тамыр оорулары менен ооруган бейтаптарга медициналык жардамдын жеткиликтүүлүгүн жана жогорку сапатын камсыз кылат.
Жыл сайын борбордун ишинин алкагында инсульт жана жүрөк-кан тамыр системасынын башка оор оорулары боюнча 5 миңге чейин минималдуу инвазивдик операцияларды бекер жасоо пландаштырылууда. Бул жогорку технологиялык медициналык жардамга муктаж болгон миңдеген бейтаптардын айыгып кетүү мүмкүнчүлүгүн кыйла жогорулатат жана жашоо сапатын жакшыртат.