Кыргызстандын коргоо министри Бактыбек Бекболотов 1999-2000-жылдардагы Баткен окуясында аскердик жана кызматтык милдетин аткарып жатып курман болгондорду урматтоо жана эскерүү күнүнө карата элге кайрылуу жасады.
Министр Бактыбек Бекболотов өз кайрылуусунда бул датанын Кыргызстандын жана анын улуттук армиясынын тарыхындагы маанисин баса белгиледи. Мындан 24 жыл мурун болгон бул окуялар өлкөнү сынаган менен бирге баалуу тажрыйбаларды алып келип, патриоттук духту бекемдеген.
1999-2000-жылдары Кыргызстан Баткен облусунда эл аралык террористтердин бандаларына жолуккан. Бул согушкерлердин аракеттеринен улам олуттуу моралдык жана материалдык зыян келтирилгенине карабастан, кыргыз аскерлери кыска убакыттын ичинде чабуулдун мизин кайтарып, республиканын аймактык бүтүндүгүн жана эгемендигин коргой алышты.
Бул салгылашууда 52ден ашык аскер кызматкерлери өз өмүрлөрүн берип, чет элдик жарандар барымтага алынган. Сегиз миңден ашуун жайкын тургундар үйлөрүн таштап качкындар лагерлерине көчүп кетүүгө аргасыз болушкан.
Министр Бекболотов өз кайрылуусунда Куралдуу Күчтөрдүн «Милдет. Намыс. Ата Мекен» деген урааны ошол каргашалуу күндөрдө терең мааниге ээ болгонун, аскер кызматкерлери өздөрүнүн конституциялык жана аскердик милдетин ар-намыс менен, берилгендик менен аткарганын баса белгиледи.
1999-2000-жылдардагы окуялар Кыргызстандын тарыхында өчпөс из калтырды. Улуттук армия бийик тоолордо күжүрмөн иш-аракеттерди жүргүзүүдө, оперативдүү камсыздоону жана күч министрликтери менен ведомстволорунун өз ара аракеттенүүсүн уюштурууда уникалдуу тажрыйбага ээ болду. Ийгиликтин негизги фактору солдаттар менен офицерлердин эрдиги, элдин чечкиндүүлүгү жана патриоттуулугу болду.
Ата Мекенди коргоочулардын эрдигинин жана жан аябастыгынын урматына көптөгөн аскер кызматкерлери мамлекеттик жогорку сыйлыктар, анын ичинде «Манас» ордени жана «Эрдик» медалы менен сыйланган.
2018-жылы Кыргыз Республикасынын Өкмөтүнүн токтому менен 26-октябрь 1999-2000 жылдардагы Баткен окуясында Кыргыз Республикасынын аймактык бүтүндүгүн жана эгемендүүлүгүн коргоодо аскердик жана кызматтык милдеттерин аткарууда курман болгондорду урматтоо жана эскерүү күнү катары белгиленет.
Коргоо министри Ата Мекенди коргоочулар мындан ары да туруктуулуктун, кайраттуулуктун жана Мекенге кызмат кылуунун үлгүсү болуп кызмат кыла беришине ишенимин билдирди. Ал бардыгына чың ден соолук, бейпил асман жана Кыргызстандын гүлдөп-өнүгүшү үчүн кызмат кылууда ийгиликтерди каалады.