Бүгүн Ош шаарында дүйнөнүн 15 мамлекетинен келген ишканалар 3000ге жакын бош жумуш орундарын сунуштады. Бул тууралуу шаар мэриясынан билдиришти.
Маалыматка караганда, кыргыз жарандарына Россия, Түркия, Казакстан, Болгария, Латвия сыяктуу мамлекеттерден келген жумуш берүүчүлөр тейлөө тармактарындагы иштерди сунуштап жатышат. Жумушка алынган жарандар иш берүүчү менен ортомчусуз, түз келишим түзө алат.
Мамлекеттик миграция комитетинин билдирүүсүнө караганда, азыркы тапта чет жактарда иштеп, окуп жүргөн кыргызстандыктардын саны миллиондон ашуун. Негизги агым Россия менен Казакстанда.
Ошондой эле акыркы учурда Түркия жана АКШда да кыргызстандык мигранттардын көбөйгөнү байкалган.