Кыргызстандын Улуттук банкынын сайтында өлкөбүздүн эл аралык валюталык резервдери кыскарганы тууралуу маалымат жарыяланды.
2022-жылдын апрель айынын жыйынтыгы боюнча Кыргызстандын дүң эл аралык резерви 2 миллиард 599,7 миллион долларды түздү. Бул тууралуу Улуттук банктын сайтында маалымдалды.
Акыркы бир айда дүң эл аралык резервдер 162,24 миллион долларга, ал эми өткөн жылдын апрелине салыштырмалуу 75,88 миллион долларга азайган. Ошол эле учурда камдардын эң жогорку деңгээли 2021-жылдын сентябрь айында болгон – 3 миллиард 241,14 миллион доллар.
Эске салсак, Улуттук банк валюта рыногундагы кескин өзгөрүүлөрдү текшилөө үчүн резервдерди колдонот. Ал өткөн жылы 15 интервенция жасап, 698,95 миллион доллар саткан. Ал 2022-жылдын башынан 5-апрелине чейин 284,3 миллион долларга чет элдик валютаны сатуу боюнча беш интервенция жана 19,9 миллион долларга АКШ долларын сатып алуу боюнча эки интервенция жүргүзгөн. Натыйжада таза сатуу 264,4 миллион долларды түздү.
