Кырдаалга ылайык, кайталанган карантинди киргизүү жөнүндө айтууга эрте. Бул тууралуу 27-апрелде өткөн брифингде саламаттыкты сактоо министринин орун басары Нурболот Үсөнбаев инфекция жуккан адамдардын саны көбөйгөндө карантин киргизилиши мүмкүнбү деген суроого жооп берип жатып билдирди.
«Кытайда жана Европада карантин сыяктуу радикалдуу чараларды киргизүү жакшы натыйжа берди. Мейкиндиктин бөлүнүшү кырдаалды көзөмөлгө алууга мүмкүнчүлүк берет. Эгерде карантин алынып салынгандан кийин, инфекциянын жаңы толкуну пайда болуп, ал кеңири жайыла баштаса, анда зарыл болгон чектөө чаралары колдонулат», – деди Үсөнбаев.
Бишкек, Ош жана Жалал-Абад шаарларында жана Кыргызстандын үч районунда өзгөчө кырдаал 25-марттан 15-апрелге чейин жарактуу болгон. Кийинчерээк ал 30-апрелге чейин узартылган. Андан кийин Нарын шаарында жана Ат-Башы районунда өзгөчө кырдаал киргизилген.
27-апрелде Кыргызстанда коронавирустук инфекциянын 695 учуру катталган, 8 адам өлүмгө учураган.
Буга чейин Саламаттыкты сактоо министрлигинин эксперттери 20-24-апрелде ооруга чалдыгуунун жогорку чеги болот деп болжолдошкон. Бирок Нурболот Үсөнбаев айткандай, күчтүү чеги болгон эмес. Коронавирус инфекциясынын ийри сызыгы бир аз тегизделген.
