Бүгүн министрлер кабинети Кыргызстандын аймагында коронавирус инфекциясына каршы кытай вакцинасын чыгаруу мүмкүнчүлүгүн талкуулады.
КР Министрлер Кабинетинин Төрагасынын орун басары Жылдыз Бакашова Пекиндеги «Тынчтык үчүн саякат» маданий алмашуу борборунун төрагасы Шао Чаньчунь менен жолугушту. Бул тууралуу министрлер кабинетинин басма сөз кызматы билдирди.
Жолугушуунун жүрүшүндө тараптар КР аймагында коронавирустук инфекцияга каршы вакциналарды чыгаруучу завод куруу жана Кытайда өндүрүлгөн өсүмдүктөргө негизделген дары-дармектерди колдонуу жаатында кызматташуу маселелерин талкуулашты.
Жылдыз Бакашова Кытай Эл Республикасына коронавирус пандемиясы учурунда өлкөгө ар дайым көрсөткөн колдоосу үчүн ыраазычылыгын билдирди. Ал жагымдуу ишкердик чөйрөнү түзүү жана чет элдик инвесторлордун кызыкчылыктарын коргоо КР Министрлер Кабинетинин артыкчылыктуу милдеттеринин бири экендигин белгиледи.
«Мамлекеттик саясат ишкердүүлүктүн эркиндигин, бизнести жүргүзүү үчүн туруктуу жана кепилденген шарттарды, ошондой эле жеке менчиктин кол тийбестигин камсыз кылуу принциптерине негизделген», — деди Жылдыз Бакашова.