Жогорку Кеңештин депутатынын мандатын УКМКнын жетекчиси Камчыбек Ташиевдин бир тууганы Шаирбек Ташиев тапшырат.
«Кечээ аны (Шаирбек Ташиев, ред.) чакырдым, ашыкча сын айттым. Бир үй-бүлөдө бир эле саясатчы болушу керек. Шаирбек жакынкы күндөрү мандатын тапшырат. Менден кийин саясатчы болушу мүмкүн. Аны менен сүйлөштүк, ал мандатты тапшырууга макул болду», – деди Ташиев.
УКМКнын төрагасы билдиргендей, Шаирбек Ташиев аны 26-январда, шаршемби күнү жасайт.
Белгилей кетсек, УКМКнын жетекчиси Камчыбек Ташиевдин бир тууганы Шаирбек Ташиев No14 Жалал-Абад бир мандаттуу шайлоо округунан депутат болуп келген.
Эгер Шаирбек Ташиев чындап эле мандатынан баш тартса, анда бул орун бош калат. Андай болсо 59-беренеге ылайык, президент кайра шайлоо дайындашы керек.