Депутат: Түркиядагы бизнес-форум тууралуу чиновниктер ишкерлерге айтпай койгон

Жогорку Кеңештин депутаты Элвира Сурабалдиева Түркияда өткөн бизнес-форумга ишкерлердин барышына өкмөт тоскоолдук кылганын билдирди.

Эл өкүлүнүн айтымында, жай айында ошол кездеги экономика министри Олег Панкратов түркиялык кесиптештери менен Стамбулда кыргыз-түрк бизнес-форумун өткөрүүгө макулдашкан. Ал ноябрь айына белгиленип, түрк тараптан 500 ишкер, Кыргызстандан 300 ишкер катышмак болгон.

«Бул форум боюнча мага кайрылып жатышат. Биздин расмий органдар форумга бир күн калганда ишкерлерге кабар беришиптир. Албетте, мындай кырдаалда билет баасы 1000 долларга чейин жетиши мүмкүн, айрымдарынын пландап алган жумуштары болот. Ошон үчүн көбү бара албай калыптыр. Ал эми кыргыз өкмөтү тарабынан барган делегациянын жол чыгымдарын чакырган тарап төлөп, кымбат мейманканага жайгаштырган. Жарым жыл мурда макулдашылган форумду кантип билбей каласыздар?» — деп суроо салды депутат.
Айыл чарба, тамак-аш өнөр жайы жана мелиорация министрлиги Азык-түлүк коопсуздугу бөлүмүнүн башчысы Анаркүл Беккулиева.

Ошондой эле Сурабалдиева мунун кесепетинен ишкерлер өз ара келишимдерди түзө албай калганын айтып, «Ушинтип отурсак кантип инвестиция тартабыз?» деп нааразы болду. Ал эми делегациянын айрым мүчөлөрү форумга толук катышпай шоппинг кылганы кетип калганын айтты.
Бул суроого кыргыз делегациясын жетектеп барган биринчи вице-премьер Боронов жооп берип, Түркия тараптан чакыруу кеч келгенин айтты.

«Бир күн калганда кабар берди дегениңиз туура эмес. Бизге чакыруу келген күндөн баштап даярдык көрө баштадык. Маселени эки тарапты тең угуп айтсаңыз жакшы болмок. Ар ким өзүнүн эсебинен барды. Анан эч ким шоппинг кылып кетип калган жок. Түркиянын вице-президенти Фуат Октай мырза экөөбүз жарымына чейин катышып, андан ары Анкарадагы иш-чарага кеткенбиз. Кечинде бизден барган ишкерлер менен өзүм жолуктум. Эч кимге чектөө коюлган жок», — деди Боронов.
Ал сөзүн жыйынтыктап жатып аталган форум эң жогорку деңгээлде өтүп, пайдалуу келишимдер түзүлгөнүн белгиледи.

Добавить комментарий