Литва Россиянын аймактарынан Калининградга жана Калининград облусуна Батыштын санкцияларына кабылган продукциянын транзиттик өтүүсүн токтотту.
Бул тууралуу Литванын бийликтери облус жетекчилигине кабарлашты, деп билдирди Калининград облусунун губернатору Антон Алиханов.
Россиянын аймактарынан Калининградга ташылган жүктөрдүн 50% чейин тыюу салынган. Эми аларды деңиз аркылуу жеткирүү керек болот, бул кымбатыраак. Алихановдун айтымында, азыр Усть-Луга-Балтийск паром линиясына жүк жеткирүү үчүн кошумча кемелерди тез арада жеткирүү талап кылынат.
Тыюу салынган товарлардын арасында курулуш материалдары, цемент жана металлдар бар. Алиханов транзиттин токтотулушун «аймакты муунтуу аракети» деп атап, эми аймакка жүк ташуунун баасы кымбаттай турганын билдирди.
Анын айтымында, Калининград облусу Еврокомиссиядан түшүндүрмө берүүнү талап кылып, керек болсо орус бийлигинен жүк ташуу үчүн субсидия сурайт.
