Улуттук инвестиция агенттигинин өкүлдөрү чет элдик инвестицияны тартуу максатында кургатылган мөмө-жемиштерди өндүрүүдө ишкерлерге керектүү колдоо көрсөтүүгө даяр.
Кыргызстандык кургатылган мөмө-жемиш өндүрүүчүлөргө КМШдан тышкаркы өлкөлөрдүн рынокторуна чыгууга жардам берилет. Бул тууралуу бүгүн “Кабар” агенттигинде өткөн маалымат жыйынында КР Президентине караштуу Улуттук инвестициялык агенттиктин директору Умбриэль Темиралиев билдирди.
Анын айтымында, бүгүнкү күндө араб өлкөлөрү, Корея, Европа өлкөлөрү, ошондой эле АКШ жана Канада ата мекендик өндүрүшчүлөрдүн кайра иштетилген продукцияларына чоң кызыгуу көрсөтүүдө.
«Жапайы алма, кара өрүк, өрүк, жаңгактын мөмөлөрү өзгөчө. Алар жапайы жерде өскөндүктөн, курамында химиялык заттар жок. Бирок бизде аларды чогултуп, кургатуучу заманбап техникалар жетишсиз. Адамдар эски ыкма менен чатырда кургашат. Ошентип, мөмө-жемиштердин ширесине таштанды чогулуп, курт-кумурскалар тыгылып калат. Кургагандан кийин, алар жөн гана үстүнкү кирди жууп, сатууга сатышат, бул эл аралык стандарттар боюнча кабыл алынбайт. Биз жаңы баштаган ишканаларды колдоп, өндүрүш процесстери боюнча кеңеш берип, заманбап жабдууларды сатып алууга жана туура рынокко чыгууга жардам бергибиз келет», — деп түшүндүрдү Умбриэль Темиралиев.
Ал белгилегендей, бүгүнкү күндө ата мекендик ишкерлер мамлекеттик органдардын жардамысыз эле чоң базарларга чыга алган учурлар бар. Демек, республикага инвестиция тартуунун артыкчылыктуу багыттарынын бири чакан жана орто бизнести колдоо болушу керек.
«Биз бир гана чоң мега-долбоорлордун артынан түшпөшүбүз керек. Биринчи кезекте биз чакан жана орто бизнести колдошубуз керек. Биз алар үчүн керектүү капиталды көптөн бери табуу максатын койдук», — деп жыйынтыктады Умбриэль Темиралиев.