Франция республиканын энергетика тармагын өнүктүрүү үчүн адистерди Кыргызстанга жөнөтүүгө, ошондой эле эки тараптуу кызматташтыкты өнүктүрүү боюнча мындан аркы кадамдарды талкуулоого даяр.
Бул тууралуу Франциянын Европа жана тышкы иштер министринин Борбор Азиядагы экономикалык дипломатия боюнча атайын өкүлү Паскаль Лоро «Европа Биримдиги – Борбордук Азия» биринчи экономикалык форумдун алкагында Тышкы иштер, тышкы соода жана инвестиция министри Руслан Казакбаев менен болгон жолугушууда жарыялады, деп билдирди КР ТИМ.
ТИМ билдиргендей, Руслан Казакбаев эки тараптуу кыргыз-француз кызматташтыгынын өнүгүү динамикасына жогору баа берди, муну дипломатиялык өкүлчүлүктүн ачылышы, КРнын Франциядагы Атайын жана Ыйгарым укуктуу элчисинин дайындалышы, ошондой эле 1-ноябрда Глазгодо өткөн дүйнөлүк лидерлердин саммитинин алкагында эки мамлекеттин башчыларынын жакында жолугушуусу далил.
Эки өлкөнүн соода-экономикалык кызматташтыгын кеңейтүү боюнча пикир алмашуу болду.
Энергетика жана суу ресурстарын башкаруу тармагындагы кызматташтыкты өнүктүрүүгө өзгөчө басым жасалды. Бул максаттар үчүн француз тарап Кыргызстанга тиешелүү делегацияларды жөнөтүүгө даяр экендигин билдирди.
Дипломатиялык мамилелердин түзүлгөндүгүнүн 30 жылдыгына арналган иш-чаралардын алкагында 2022-жылдын башында Кыргызстанда кыргыз-француз бизнес форумун өткөрүү боюнча макулдашууга жетишилди.
Тараптар ошондой эле эки тараптуу кызматташтыкты мындан ары активдештирүү үчүн келишимдик-укуктук базаны кеңейтүүнүн маанилүүлүгүн белгилешти.