КР Эмгек министрлиги менен Япониянын өкүлдөрүнүн ортосундагы келишимдерге ылайык, 300 кыргызстандык Япониядагы заводдорго иштөө үчүн барат.
Бул тууралуу Эмгек, социалдык коргоо жана миграция министрлигинин басма сөз кызматы билдирди.
Келишимге кол коюу үчүн Япониядан делегация келгени белгиленген. Бул өлкөгө кыргызстандыктар качан жана кандай шартта эмгек миграциясына кете ала турганы айтыла элек.
Ошондой эле мекеменин маалыматына караганда, Жарандарды ишке орноштуруу борбору япониялык компаниянын башкы директору жана Арабаев атындагы КМУнун Жапон таануу институтунун директору менен кыргызстандыктарды Японияда окутуу жана андан ары ишке орноштуруу боюнча кызматташуу боюнча келишимге кол коюшту.
Соңку расмий маалыматтар боюнча, чет өлкөлөрдө Кыргызстандын 1 миллион 118 миң жараны иштейт. Кыргыз Республикасын 2026-жылга чейин өнүктүрүү программасына ылайык, жакынкы 5 жылда бийлик өлкөдөгү жумушсуздукту 5,8ден 5%га чейин кыскартууну көздөп жатат. Ал эми муну биринчи кезекте миграция аркылуу ишке ашыруу пландалууда.
Жакында КР Социалдык коопсуздук жана миграция министрлиги Улуу Британия, Корея, Германия, Финляндия жана башка өлкөлөргө иштөөгө жөнөтүлө турган кыргызстандыктарды борборлоштурулган ишке алуу боюнча мамлекеттик программаларды жарыялады.