Кыргызстанда 15-мартта “Элдик курултай жөнүндө” мыйзам долбоору күн тартибинен чыгарылды.
Кечээ Жогорку Кеңештин жыйынында “Элдик курултай жөнүндө” мыйзам долбоору күн тартибинен чыгарылды. Долбоорду талкуулоодо депутаттар долбоор 9 ай мурун четке кагылгандан бери өзгөрбөгөнүн белгилешип, ал үчүн жумушчу топ түзүүнү сунушташты.
Былтыр май айында Жогорку Кеңештин Конституциялык мыйзамдар, мамлекеттик түзүлүш, сот-укуктук маселелер жана регламент боюнча комитети президент Садыр Жапаров тарабынан демилгеленген “Элдик курултай жөнүндө” конституциялык мыйзам долбоорун четке каккан. Дооматтар негизинен бул институттун статусуна, анын ыйгарым укуктарына, делегаттарына жана президенттик администрациядан көз карандылыгына байланыштуу болгон.
Бирок мыйзам долбооруна байланыштуу талаш-тартыштарга карабай президент Садыр Жапаров август айында 2022-жылдын ноябрь айында өткөн “Элдик курултайды чакыруу жөнүндө” жарлыкка кол койгон.