Британиянын тышкы иштер министри Лиз Трасс консерваторлор партиясынын лидерин шайлоодо жеңишке жетиши мүмкүн.
Sky News (YouGov) сурамжылоосуна ылайык, ал атаандашы, мурдагы каржы министри Риши Сунактан 32% көбүрөөк алат.
Өз тандоосун жасаган партия мүчөлөрүнүн 66% Трасска, 34% Сунакты колдойт. Эки жума мурун ал дагы чоң артыкчылыкка ээ болгон – 38%. 13% жакыны өз каалоолору боюнча чечим кабыл алышпаганын же добуш бербей турганын айтышкан.
Шаршемби күнү эртең менен аяктаган сурамжылоодо респонденттердин 57% буга чейин добуш бергенин айтышса, 38% добуш берүүгө ниеттенүүдө.
Добуш бергендердин ичинен 68% Трассты, 31% Сунакты тандады. Добуш бере электердин 44% Трассты шайлайбыз десе, 29% Сунакты, 26% билбейт.
Учурда почта аркылуу добуш берүү жүрүп жатат, ага Улуу Британиянын консервативдик партиясынын бардык мүчөлөрү (160 миңге жакын) катышууда. Жеңүүчү 5-сентябрдан кечиктирбестен жарыяланышы керек. Андан кийин королева аны Британ өкмөтүнүн премьер-министринин кызматына дайындайт.
Премьер-министр Борис Джонсон июль айынын башында бир нече ички саясий чатактардын басымы жана партиялаштарынын чакырыктары астында Консервативдик партиянын лидерлигинен кетүүгө аргасыз болгон. Торинин жаңы лидери шайланганга чейин Джонсон премьер-министрдин милдетин аткарууну улантат.