Кыргызстанда орточо эмгек акы 11,4%га өсүп, 20 миң 943 сомду түздү (чакан ишканалардын кызматкерлерин эсепке албаганда).
Бул тууралуу КР Экономика министрлиги билдирди.
Чарбалык иштин бардык түрлөрүнүн ишканаларында жана уюмдарында эмгек акынын өсүш темптеринин жогорулашы байкалды.
«Эң олуттуу өсүш саламаттык сактоо жана калкты социалдык жактан тейлөө (32,7%), тоо кендерин казып алуу (29,3%), транспорт жана жүктөрдү сактоо (19,7%), кесиптик, илимий жана техникалык ишмердүүлүк (19%), искусство, оюн-зоок жана эс алуу (18,6%), курулуш (17,4%), финансылык ортомчулук жана камсыздандыруу (17,4%), ошондой эле өндүрүш (14,1%) чөйрөсүндө байкалган», — деп билдирет Экономика министрлиги.
Белгилей кетсек, 2021-жылдын апрель айында орточо эмгек акы 19 миң 586 сом же 230,9 долларды түзсө, бүгүнкү күндө долларга карата орточо эмгек акы 254 долларга чейин өстү.
