Кыргызстанда ун жетишсиз, бул ун азыктарынын 30% кымбатташына алып келиши мүмкүн
Үстүбүздөгү жылдын эки айында өлкөгө дээрлик 28 миң тонна буудай жана Россия менен Казакстандан дагы 3,2 миң тонна ун алынып келингени менен, колдо болгон запастар июнь айына чейин араң жетет. Бул тууралуу экс-айыл чарба министри Тилек Токтогазиев билдирди.
Түзүлгөн кырдаал негизинен ЕАЭБдин өнөктөш өлкөлөрүндө ун менен буудайды экспорттоого тыюу салуунун акырындык менен киргизилиши менен шартталган.
«Россиядан буудайды экспорттоого тыюу салынганга чейин тегирменчилер 21 рублдан сатып алышкан. Учурда мамлекеттик материалдык запастагы буудайды 23-24 сомдон алып жатышат. Бүгүнкү күндө буудайды Казакстандан сатып алса болот, бирок логистиканы эске алганда анын баасы 30% кымбат болот», — дейт экс-айыл чарба министри.
Токтогазиевдин божомолу боюнча, керектөөчүлөр күзүндө буудайдын баасы ушундай эле пайызга көтөрүлүп, ага жараша андан жасалган продукциянын баасы да кымбаттаганда сезишет. Мындай болбош үчүн, экс-министрдин айтымында, азыртан буудайды экспорттоого квота берүү боюнча Россия менен сүйлөшүүлөрдү жүргүзүү зарыл.
«Биз ЕАЭБ деңгээлинде сүйлөшүүлөрдү жүргүзүп, РФга буудайды экспорттоого тыюу салуунун Кыргызстанга жеткирүүгө тиешеси жок болушун камсыздоо керек. Биз бирдиктүү экономикалык мейкиндиктебиз. Бизге буудай бербей, чектөө киргизишсе ЕАЭБдин эмне кереги бар? Мындай болбошу керек, ЕАЭБ биримдиктин өлкөлөрүнүн ортосунда экономикалык жана соода чек аралары жок деп эсептейт», — деди Тилек Токтогазиев.
Бул аткарылбаса, Токтогазиевдин айтымында, ун азыктарынын баасы сөзсүз көтөрүлүп, домино принцибине алып келет.
«Тагыраак айтканда, бул таптакыр бардыгына таасир этет. Биз таттуулардан, шекерден, колунда бар адамдар гана ала турган кээ бир азыктардан баш тарта алабыз. Бирок биз нан жана нан азыктарынан баш тарта албайбыз. Ундун кымбатташы менен башка бардык товарлардын жана кызматтардын баасы көтөрүлөт», — деп баса белгиледи экс-министр.
Анын айтымында, жалпысынан баанын көтөрүлүшүн күтүшүбүз керек, анткени дүйнө жүзү боюнча төмөн түшүмдүүлүк катталган. Бирок кескин секирүүгө жол бербөө маанилүү.
